Gedanken *zwischn de Joahr*

Zwischn de Joahr...

…is sozunsong*  a Neamadsland:
As oid Joahr  z`End - as nei no ned;
Sylvestakracha kafft ma ei –
vo Gejdknappheit is do koa Red !
 
Wann jeda Deitsche grod moi fünf
€uronen ausgibt für den Schmarrn,
san`s  400 Milliona ! – Mensch –
do kunnt i lang in Urlaub fahrn !
 
Und Ferien ham Kinda iazt,
de Lehra aa – mei, de ham`s  schee !
Und noch Dreikini langsam, na
werds Alltagslebn weita geh…
 
I bin scha gspannt, wos`s  neie Joahr
uns bringt – an Lottogwinn, wenns geht?
Und Katastrophn, Kriag vielleicht
und ob de Wejt iatz untageht?
 
*sozusagen