Ich möchte zunehmen...

Ich weiß, ich falle jetzt völlig aus dem normalen Rahmen, denn:
I mecht zuanehma !!!

 
Ois kloana Bua, do woar i schmachti,
(und bluatarm – hat da Dokta gsogt)…
Ois Bursch woars aa no ned recht machti.
Ob i leicht grang bin, hams mi gfrogt.
 
Ja - gspachtlt hob i oiwei fest gnua…
An dem, do waars ja gwieß ned gleng.
Doch aa mit dreißge und mit vierzge
hat ma bei mia koa Bäuchal gsehg.
 
Und d Muadda frogt mei Frau a diamoi*,
ob s ma ned gnua zun Essn gaab?
De hat ned gwisst, wos se no doa soj,
und werd desweng scho langsam graab**…
 
Zun Dokta bin i ganga oft scho,
doch der, der hejft ma aa ned recht…
I werd ned dick – des is amoi so!
Drum bin i grod a dürra Hecht!
 
So bleib i schlank - a Hungahakn…
Ja, Tipps  zun Obnehma gab`s  gnua!
Mecht oana  “s Bäuchal kriang” opackn,
vahejft eahm kaum oana dazua!
 
*  öfter mal, gelegentlich      **grau              P.U.  05.03.12