Paul Rudolf Uhl
A Los mia kauft...
De Dog hob i a Los mia kafft,
mit dem kunnt ma – im günsting Foj –
und, wann de Kugl richti lafft,
Milliona gwinna… – Hoppla - hoj!
Hob übalegt, wos i na dua
mit `ra Million… - Mach i a Roas
um d Wejt? – Ja, und vielleicht dazua
a Haisl kauffa? - Mei, i woaß
ned. – Soitt i leicht moi spekuliern?
mit Aktien oda ebba goar
mit irgndwejche Wertpapiern?
Kunnt oiss valiern, wia`s ja scho woar…
Drei Nächt studiert lang hob i dann:
De Bankn trau i nimma, weil
se morgn vielleicht scho pleite san,
na bleibt ma nix fürs Oidnteil…
Dann hob i gwusst: an Safe kaff i
und heb oiss auf im Panzaschrank.
Im Fernsehn heari i – Sakradie –
i hob nix gwunna – Gottseidank!.
Die Rechte und die Verantwortlichkeit für diesen Beitrag liegen beim Autor (Paul Rudolf Uhl).
Der Beitrag wurde von Paul Rudolf Uhl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 31.03.2012.
- Infos zum Urheberrecht / Haftungsausschluss (Disclaimer).