Ban Juwelier

In d‘ Stodt drei ban Juwelier,
kimmt a‘ feina Pinkl durch die Tüa.
Gutn Morgn,
könnans füa mei Gattin an Ring besorgn.
 
S’muaß wos ausgfollns sei ,
ah Diamantring war fei.
Göld spült dabei keine Rolle,
Er is zan Geburtstog füa mei Holde.
 Jo do hätt ich a‘ Idee,
der wird recht sche.
strohlt übas gaunzi Gsicht,
dös is a’Gschicht.
 
Gehn ma glei in nextn Raum,
do erfüll ihnan Traum.
Mocht van Ring a‘ Zeichnung daun,
Ih fertig den Ring glei sölba aun.
Hot van Ladl daun ,
a‘ schwoazes Packl ausa gnaum.
 
Tuat s‘ Schnürl oba wicklts aus,
legts am Glospult holt glei aus.
Ih hob‘Rohdiamantn do,
Dö san nou gornet gschliffn jo.
 
In ollen ehrn,
er untaholt si mit den feinan Herrn.
Hot dabei gaunz übasehn,
Sei Büabal  um d ‘ Eckn spähn.
 
 Wal dos Gschäft jo kloa,
mit da Wauhnung vabundn woar.
Da Guldschmied hot vagessn wegn den Herrn,
d‘ Diamantn ein zansperrn.
 
 Daun is dos Büabl alan aunkemma,
d ‘ Muatta is zan Wäsch oh nehma
Da Vota wia suls aundascht sei,
Is in seina Werkstodt drei.
 
Dos Büabal schleicht si in den Raum
Wou s’d‘ Rohdiamantn haum.
Er moant dos müaßns sei,
Ah d ‘Brustzuckerstückerl fei.
 
S‘ Bröckerl scho vorn Mund,
d‘ Mutta zruck scho kummt.
Dos Kind schreckt sih urntli duat,
da Rohdiamant war fuat.
 
Im Spitol wird da klane woch,
moant da Vota wos mochst den du füa Soch.
 
D‘ Muatta nimmtn in Oarm glei sou,
Goutt sei daunk bist eh nou do.
Daun kimmt da Doukta nou za ehm
Glei tan dos Bübl hiatz belehrn.
 
Tua dos jo net mehr an Rohdiamantn
Schluckn do kaunnst leicht sterbm.
S‘ Büabal drauf,
hätt a‘ leicht zerscht koucht sulln werdn.
 
 
©  Harald Friedl