Mord und Totschlag bei den Klassikern

Ja – Mord und Totschlog konn ma lesn
beim Schiller – mei, bei dem geht’s zua:
Mi´m Ibikus is scho so gwesn,
ja – und de Kraniche schaun zua!
 
Da Möros muaß a poar so Räuba
daschlong, damit er hoam no kimmt
zur rechtn Zeit, dass – so der Schreiba –
seim Freind as Lebm jatz koana nimmt.
 
Ganz obgsehng vo dem junga Kundn,
der nach dem Weinpokal hat taucht:
Aa der hat ja an Tod do gfundn
am Meeresgrund. - Gwieß hats nan gschlaucht!
 
Beim Goethe, do is zwischndurch ja
moi aa recht tragisch: – I denk grod
an den kloan Buam, am Gaul beim Vadda:
Den bringt da Erlkönig um. - Schod!
 
Moral:  Scho bei de zwee, do lest ma
vo Mord und Totschlog, Gwoit um Gwoit !
Es duad aa Katz de Mäusal fanga…
Ja, mei – na akzeptier ma`s hoit!