Bergsteigen

Auf da Zugspitz samma gwesn
mit da Seilbahn, wia se´s  gheart.
De Zeit, wo ma z Fuaß des packt ham,
is seit zwanzg Joahr scho vajährt…
 
Acht Joahr her, dass ma auf d Oipspitz*
gstiegn san üban Klettasteig…
Lange Bergtourn, siebm bis acht Stund –
do zua samma z oid und z feig.
 
Auf de Wuidspitz** kimm i nimma:
D Luft is z dünn in dera Höh´…
Nockherberg , do drobm z Minga, ***
schaff i no – des is doch schee!
 
Und an heilign Berg vo Andechs,
wo´s de Klosterbier do brau´n…
Aba noch drei Maß vom Starkbier
daad´s  mi s Bergal owe haun…
 
Bleibt mo no da Venushügl
und da Busn vo meim Weib…
Mei – ma muaß si hoit bescheidn
mit an andan Zeitvatreib…        

P.U.  11.05.12
 
*   Alpspitze, 2618 m    29 x bestiegen   
**  Wildspitze, 3778 m, 6x bestiegen
*** München, immer nur am Fernseher bestiegen (;-))