Vogelsang (2)

   Problemchen der Ruheständler:
 

 
Des Amsl-Manndl singt sei Liad
vor´m  Fensta draußt scho friah um drei…
Es wird ja  Somma – is doch schee !!!
Des konn aba aa lästig sei…
 
I woitt eingli no ned so friah
scho aufgweckt wern – i bräucht mei Ruah.
De andan Vögl – meine Herrn –
de zwischan aa recht laut dazua…
 
So lieg i wach – lass des Konzert
hoit eiwirkn – fortissimo…
Bis Kirchglockn endli dann
- um sechse - s Läutn fanga o.
 
Dann steh ma auf, mei Wei und i –
zum Frühstück, weil des braucht ma gwieß,
Danoch leng ma uns drei Stund hi,
weil d Nachtruah uns ja heilig is…
 
                                                                P.U. Ende Mai 12