MARKETING

Autobiografisch, dieser Tage wirklich fast passiert:

I lieg im Gros, im Goartn drauß,
an Groshojm hob i drin im Mäj,
hoit s Gsicht in d Sunn, de Augn san zua –
do hear i wos – wos konn des sei?
 
Mach d Augn auf und i drah an Kopf
ganz vorsichtig auf d Seitn zua:
Oan Meta neba mia – a Hos,
der mümmlt, schaut mi o in Ruah...
 
I hoit mi staad – er wacklt mit
de Löffe. - Des hoaß do ganz gwieß,
i soit koa Angst hom, und dass er
da echte Osterhos ja is…
            
Sei Marketing – sogt er, des braucht
an Vorlauf scho ganz weit voraus,
im Hirgst… Damit an Ostan oiss
guad hi haut. – Aa de Nikolaus,
 
werdn ja im Juni produziert…
Des is so auf da ganzn Wejt.
Warum? - Des is im Business so –
do geht’s hoit um des große Gejd…