Tatsch - Handy

Mei Handy wor scho ziemlich oid
da Akku hot scho gspunna
mei Enkal hod a neiches griagt
und i hob des oide übanuma.

Noch ana kurzn Einführung
hob i mir denkt i habs kapiert
und hob daun ba meim neichn Handy
des tatschn ausprobiert.

Mei liaba Schwan des is net afoch
des neiche Klumpat hunzt mi gscheid
vielleicht is mei Tatschfinga zbrat
schee laungsaum vageht ma Dfreid.

Druck i wo drauf ruaf glei wenn au
do muast scho sehr guad schaun
Hallo....tschuidigung......hob mi fawöht
ob ma de des nachn drittn moi nu glaubn.

I trau mi scho goar nimma frogn
wia des moderne Zeig da tickt
mei Enkal sogt ah irgendwaun
geh Oma.....host des nu net tscheckt.

Zwa Wochen tatsch i mi nu durch
und waun i des daun nu net tscheck
daun kaun i ans scho sicha sogn
hau i des blede Klumpat weg.

© Eva Leitgeb