Schnee

A weng an Schnee, den find i guad!
Und zwoa Grod minus ghearn dazua,
wann’s aba mehra schneibn moi duad,
valiern de Menschn glei de Ruah:
 
De Lastwogn, de bleibm hänga dann,
se rutschn vo da Fahrbahn glei…
De PKW foahrn dann und wann
in so a Schneewächtn aa nei…
 



Und Notarzt, d Hebamm, d Feiawehr,
de kemmma aa so leicht ned hi,
wo ma se braucht, und folgnschwer
is des – ja Himme, Sakradie!
 
Z vuj Schnee, des hoaßt Lawinagfoahr
und Dörfa werdn vaschütt, rasant…
Am liabstn daad da Mensch sogoar
aa des no regln – wann er kannt.
 
Doch oiss wird bleibm, so wia s moj is,
mia werdn s ned ända - des is gwieß!