Biarschtl-Briada

Im Wirtshaus samma ghockt beinand
zun Dämmaschoppn – woarn zu siebt:
Da Rudi, Franze, Ferdinand,
da Sepp, da Fritz und i… – Des gibt
 
erst Sechse – woaß scho! - Do dazua:
Karl-Friedrich – mei, des woar a Preiß,
trotzdem a netta, fescha Bua…
Is lang oft gsessn auf sei’m  Steiß !
 
De Biarschtl-Briada ham s uns gnennt.
Jedn  Mittwoch und je’n  Freidog muaß
ma do sei ! – Nâch vier Maß, am End
bin i  zmeist hoam – mi’n  leichtn Ruaß…
 
Mei Wei moant, dass des goar ned mog
und macht an de zwoa Dog a Gfrieß,
weil an dem Wirtshaus-Biarschtl-Dog
min „Biarschtln“ nix mehr ganga is…
 
* Sauf-Brüder…Bürsteln steht für saufen, aber auch für Sex.     P.U. 23.03.13