an Horstl sei 63. Geburtsdog

"Internas" zu Horst Seehofers 63. Geburtstag am 04.Juli 2012:
               
S is Staatsbankett in Minga drobm,
weil da Ministapräsident
Geburtsdog feiat – muaß ma lobm –
hat eiglodn oiss, wos prominent…
 
Zur Vorspeis gibt’s Solot*, ja, und
dazu Kartoffaln, wia se s gheart…
Der Mix is kaum im Mogn do drunt,
do werd von ra Maß Bier er gstört.
 
„Ja, Sakra! – Wo kimmst du den  her?“
Frogt da Solot – scho irritiert.
“Hey, hey – i bin ned irgndwer:
Da Horstl hat mi grod spendiert!“
 
Vo drobm heart ma scho wieda: „Prost!“
A Uzo schwoappt iatzt nei in Mogn…
„Wo kimmst iatzt du her? Host wos kost?“
„Vom Horst spendiert!“ heart ma eahm sogn.
 
Solot is stark daschwoappt scho recht…
A Obstler kimmt daher mit Schwung!
„Woher kimmst du?“ er wissn mecht.
„Vom Horst spendiert – zur Abhärtung!“
 
„Jatzt horchts moi zua: Seids ma ned bös,
dass i mi nimma hoitn ko…
Des Gwasch is wirkli desaströs –
I schau mia jatzt den Horstl o!“
 
* Salat                                             P.U.  zum 04.07.2012