Obmds im Goartn (Hundstage, Wespen)

A so a Weizn – omds  im Goartn,
wenn  d Hitz nochlasst – des is so guad,
in so am hoaßn, trockna  Summa,
wo s  wirkle fast nia regna duad…
 
Duast dann dazua  wos essn freili
- an Radi und a Fleisch dazua –
na kemma d Websn – mei, de Luada,
de mechtn aa wos – kriagn ned gnua...
 
Dann saben* se mit ihre Kiefa
a Stückl Fleisch ob – woinn davo…
Fast kennas nimma fliagn, de Viecha:
Do - oane übakeabets** scho !
 
Werds finsta dann, na  kemma d Stauzn,
de stechan  di  und woinn dei Bluad…
Na muaßt di hoit ins Haus vadrucka;
So mancha kriagt desweng a Wuat !
 
Und trotzdem: Pfundig is des Le(b)m
Mia san so glückli - früah bis spat…
Doch stinga daads  uns, wenn des vo
de Nacharn koana merka daad !
 
* säbeln   ** überschlägt es                  P.U.  08.08.03/21.06.13