Erntezeit

Jatz bin i üba d Fejda ganga,
zum „nordic walking“ – kennst as eh…
De Erdbeern gibt’s  jatz übaroj scho –
do konn i kaam vabei dro geh !
 
A Pfund Zwoadeißge kostn s freili,
scho fertig brockt – des is bequem.
De sejba brocktn kostn d Häjfte,
doch do muaßt da a Müah hojt gebm…
 
Und weil ois Rentna i koa Zeit hob,
mein Sport ned untabrecha mecht,
hob i de brocktn im Vabeigeh
schnej kauft, probiert: schmeckt goar ned schlecht !
 
Im Rucksock hob i s dann aa hoam trogn.
De ess i mit meim Weibal glei…
I gfrei mi: De gibt’s dann mit Zucka
und  Sahne ! – So a Schleckarei !