Schattenlos

Hob gspannt, dass i koan Schattn wirf,
wia s friahra ojwei war - ja, mei…
I hob mi gfrogt, warum s so is,
des konn ja eingli goar ned sei !
 
Wisst ned, dass i mein Schattn an
den Teifi hät vakafft ois wia
da Peter Schlehmil* für vuj Gejd…
A so wos Dumms daad i goar nia!
 
Vielleicht is ja da Alkohol -
de vierzehn Hoibe gestan woarn
doch z vuj; bin koane Zwanzge mehr…
Naa, konn ned sei, des is a Schmoarrn,
 
es woar grod zehne… Aba jatzt
do foit ma ein, de Sonnacrem
mim Faktor achtzg, de woar wohj z stoark?
Ma lernt ned wirkli aus im Lebm…
 
Auf oamoi rasslts greisli laut…
Wos is? – Ah so, da Wecka duad !
Hob ma scho denkt, dass i bloß draam.
Weil ohne Schattn - waar s ned guad…
                                                              
*Märchen des Dichters Adelbert Chamisso    P.U.  23.07.13