Der Hafer

Die Werbung suggeriert für manche Produkte
ein trügerisches Fitnessgefühl...

 da Howan
 
„mymuesly“ hob i glesn und
mia denkt: Paul, des probierst amoj,
weil soiche Müsli san gwieß gsund,
und dass ma gsund ernährn sich soj…
 
San Hafaflockn drin und vuj
Ballaststoff’ - Vitamine aa.
Hob gmerkt, dass i mehr sportln wuj;
da Bluatdruck sinkt – so muaß des sa !
 
Im Biergoartn san Spezln gwen.
De’  woitt i zoagn, wia guad s mia geht;
A wengal ogebm, drüba redn…
Hupf üban Zaun! – Ja, bin i bled?
 
Da Hexnschuss hat eingstejt si.
Ja: Schmerztablettn, vierzehn Dog,
so dass i krumm grod ganga bi
und aa koa Müsli nimma mog !
 
Da Weizntoast der is iatzt „in“…
Mei Wei schmiert Mamaladbrot grod.
Warum i üban Zaun ghupft bin?
Weil mi da Howan gstochn hod !