a zwoates Lebm

     „Ma lebt bloß oamoj“ sogt ma oft…
     I hob ma denkt, do daad s wos gebm;
     und mancha hat aa drauf scho ghofft,
     dass er no kriagt a zwoates Lebm…
 
     I zweiflt dro, doch nix is gwieß…
     Weil - wann de Seel unsterblich is,
     schlupft s  bei da Zeugung eh ganz gschwind
     in irgnd so a neiches Kind?
 
     Da Papst sogt „Naa!“ Ma muaß brav lebm -
     wannst stirbst, na kimmst vorn Herrn sei Gricht
     und zittern muaßt, vor Angst aa bebm!
     A Reinkarnation gibt’s nicht…
 
     Und a korrupta Aufsichtsrat,
     der Reichtum schefflt, so ganz schnej,
     sich  bscheißarisch bereichert hat,
     der stirbt und kimmt hojt dann in d Höj.
 
     Vielleicht aba is andast rum:
     Wann i a Tierquäla bin gwen,
     dass i ois Maus dann wiedakumm -
     ois Straf – des waar doch homogen?
 
     Bei reich und geizig – in dem Fall -
     gerecht waar s scho, wenn ganz bestimmt
     a soicha Kerl beim nächstn Mal
     ois Bettler auf de Wejt dann kimmt???