Winter 3

Jatz is hoit do no Winta wor(d)n,
sogoar in Bayern und Tiroj…
De Autoscheibm san wieda gfroarn,
de Liftbetreiba fuhjn se Wohj…
 
Da Schneepfluag rumped in da Fruah
um sechse scho am Haus vabei,
straht Tonnen Sojz (mia ham ja gnua!)
und schaufe(l)n  sehgt ma d Leit – ja, mei…
 
Ne(b)mbei: Wo s eisig is, do kracht
oa Auto in des andre nei…
De Rep’raturwerkstatt, de lacht:
As Gschäft, des bliaht, des muaß so sei!
 
De Kinda kenna n Schneemo baun,
im Schujhof gibt’s a Schneebojschlacht,
da Fasching lasst uns Noarrn oschaun,
so hat da Winta Freid uns gmacht !
 
Und trotzdem: D Frühajoahrssehnsucht is
Scho in uns drin… - A längra Dog,
der zoagt, da Auswärts* kimmt ganz gwieß…
I gfrei mi, weil i eahm so mog !
 
* Frühling