Frühlingsgfuhj

Da Auswärts, ja der kimmt vui z friah:
Es is erst März und hat scho fast 20 Grod !
So friah, glaab i, woar wohj da Frühling nia.
De Bauan aber fiarchten um de Soot:
 
Vui z trucka iss  – wo bleibt da Regn
(normal hat’s um de Jahreszeit no Schnee)?
De Hund trainiern scho ganz verwegn
de Fortpflanzung, da Mensch as Defilee -
 
(an Aufmarsch). – I moan as Flaniern;
die Dirndl: dünne Blusn – is ja warm…
De Teen-Edscha, de üben s Kokettiern,
die oidn Herrn vaströma eahnan Charme…
 
Mei – übm brauchat ma des Gspuj wohj ned,
a jeda kennt ja doch des Ritual…
De Liab kimmt jeds Joahr, des is goar ned bled.
Ja, und des funktioniert aa optimal…

Doch, wann s so weida geht, de Joahr,
na kimmt de Friahjoahrsliab ganz gwieß
scho bojd so Anfang  Februar…
Zefix -  ma woaß ja ned, wos dann oiss is !