Wo sind denn de Bösen?

Wo sand denn de Bösen – im Parallel-Universum?
 
Sterbebuidln
 
Am Sterbebuidl findt ma nix
wia Lob. Er is da Beste gwen !
Und freindli oiwei. – Sapprafix –
a Heiliga woar’s  fast im Lebm…
 
Ob Mo, ob Frau - do steht nix drin
vo Grantigkeit und Schimpfarei,
vo Saufa, Liagn und Eignsinn,
vo denunziern – ja, konn des sei???
 
Weil, scheinbar stirbt koa Bazi und
koa Bissguan. – Konns denn sowos gebm?
Koa Ratschkatl, koa Lumpnhund…
- Vasteh des ned, i bin danem…
 
Wo sand de olle, de nix taugn?
- Vaschwindn de im Nirgndwo
ganz unauffällig? – Unsre Augn
sehgn do ned hi - des is wohj so…
 
                                                                 P.U. 11.06.14