Mit wos'd ma geh konnst

Zua horcha, wenn oana verzählt an recht’n Schmarr’n,
mit’m Radl a’n Berg auffi fahr’n.
In d’Stodt zum Eikaffa renna,
wenn’s wochalang nimmer aufhört zum Renga.
 
A’n Durscht hob’n aber koa Biar,
am Klo sitz’n ohne Papier.
Mit’m Fiaba im Bett drin lieag’n miass’n,
Weißwürscht ess’n ohne an Senft, an siass’n.
 
Koan Platz auf’m Oktoberfest kriag’n,
länger wia vier Stund in am Fliaga fliag’n.
A greißliche Musi o’hearn,
si selber zur Haustür naus‘ sperr’n.
 
Erbs’n oder Bohna-Gmias ess’n,
beim Furtfahr’n irgendwas vergess’n.
Wenns’t  ei-g’raucht werst von olle Seit’n,
oder d’Hos’n nimmer passt in da  bundanan Weit’n.
 
Wanns’t wo ei g’ladn bist und a
                   warm’s Bier tringa duast miassn,
In da Schiaßbude koa oanzig’s Bleamal duast schiass’n.
Wenn an da Gitarr a Sait’n obreißt,
oder wenns’t de sauba mit’m Radl schmeißt.
 
Alle Jahr zum Zahnarzt muaßt  geh,
in a Schlanga duast dauernd an da Kasse steh.
Im Gras in a’m Ameisennest lieg’n,
net Obacht geb’n in a Biena eine g’stieg’n.
 
A’n Fingernogl ei’g’riss’n,
oder aus Verseh’n auf’d Zunga biss’n.
Lotto spui’n und überhaupts nix g’winna,
wenn  im Bad  da Wasserhahn duat  rinna.
 
Im Auto ohne Klima schwitz‘n,
oder in der lauwarma Bio.Sauna  sitz’n,
all des, des is fei  net so schee‘,
mit all dem konnst ma liaba geh‘!