Der Fall vom Ritter Kunibert

oder : So warn's de oid'n Rittersleit
 
Seit vielen Jahren, Ihr derft’s net lacha,
hot unsre Oma an Bewacher.
Auf dem Kastl, do im Flur,
steht a mortstrum schwaare Figur.
 
Schee o‘zuschaug’n im Messing Flitter,
steht do der imposante Ritter.
Der wacht do über Hab und Gut,
was in dem Schrankerl drinnen ruht.
 
A no für andre Sacha’n is er guat,
z.B. Telefonschnur er hoit’n duat.
Und weil er hot hoit so a G’wicht,
g’hört a as Briefbeschwern zu seiner Pflicht.
 
Kurzum der Kunibert a guater G’sell,
net wegzudenka von der Stell.
Bis vor letzter Wocha – s’is fei schod,
sei Leb’n sich dramatisch g’ändert hot.
 
Ois waar so g’miatlich weiterg’loffa,
hätt er net den Onkel Hans do troffa.
Der schaugt eahm finster glei ins G’sicht,
und spricht zu eahm: „Du schwaarer Wicht –
 
A Bewacher wuist du sei, i glaub i spinn,
du bist doch blos a Volksfest-Gwinn.
Du nixnutziges Eisen-Trumm,
stehst doch an ganz’n Tog blos rum.“
 
Den Ritter reißt’s – er wird ganz hantig,
ja so a Ritter, der wird ganz schee grantig.
„Des oane“, sogt er, „dearfst ma glauben,
i dua dir glei mei Schwert nauf haun“.
 
 
Kaum ausg’sprocha – fei gar net dumm,
setzt er sein Plan in d’Tat glei um.
Doch der Onkel Hans, ja der ist schon,
In gebührender Abwehrposition.
 
Der Onkel Hans droht mit’m Hacklstecka,
ich wird dich glei dernieder strecka.
Koana wui den Kampf verlier’n,
und sie fleißig duelliern.
 
Der Ritter, der fuchtelt und fechtelt am Kastl ob’n rum,
er wackelt und nackelt, und glei foit er um.
Der Onkel is mittlerweile bewaffnet schon,
mit der Schnur vom Telefon.
 
Wia a Lasso schwingt er’s elegant um die Eck’n,
und bringt damit den Rittersmann zur Streck’n.
Der widerum der steht sehr schiefe –
Und stürzt sich in hohem Bog’n in die Tiefe.
 
Ziel is des Onkel Hansens Zäha,
doch der Onkel macht an Dreher,
weicht dem Absturz-Ritter aus,
und kummt ganz heil aus dieser Sach glei raus.
 
Für’n Ritter schaut’s do anders aus !
Der is ganz schee lediert – a so a Graus.
Am Bod’n aufg’schlag’n mit seine Messing Knocha,
do hot er sich oi zwoa Fiaß obbrocha.
 
Jetzt is da Ritter gar arm dro,
sei Arbat konn er nimmer do.
Die Oma woant, wer duat jetzt wacha
Über meine guat’n Sacha ?
 
I sog zu Ihra drauf ganz nett,
dei Ritter muaß ins Lazarett.
In zwoa Tog, do konnst’n wieder hab’n,
dann steht er wieder am Kasterl ob’n.
 
Mit Superkleber hob i ‚n pappt,
i glaub des hot ganz prima klappt.
Guat zua g’redt hob i eahm a no,
er soi sich staat hoit’n der Ritters-Mo.
 
Jetzt trohnt er wieder an gewohnter Stell,
von seine Verletzungen hot er sich erholt ganz schnell.
Vor oana Sach aber hot er Respekt –
Wenn eahm der Onkel mal wieder entdeckt.
 
Der Ritter muaß, - des is ganz klar,
sein Dienst no doa für viele Jahr.
Drum sog i jetzt zu Dir, Onkel Hans,
lass doch bitte den Rittersmann ganz .
 
Und die Moral von der Geschicht,
kämpf net mit Rittersmänner nicht !