Paul Rudolf Uhl
Ozapft is !
Oane vo de scheenstn Sachan,
de wo d Burgamoasta machan,
is, den großn Schlegl schwinga
und des Bier zum Laufa bringa !
Wenn a Gmoaboss do in Bayern
s Ozapfa und s Feste feian
ned beherrscht, is schlimma nacha
ois im Amt an Fehla macha !
Duad er goar as Bier vaspritzn,
hoaßts, der wird aa sonst nix nützn.
Scho drei Tropn nimmst eahm übe,
ois waars glei a ganza Kübe !
Aa z vui Schläg zum Eitreibn braucha
konn an Burgamoasta schlaucha.
Vorigs Joahr, konnst sofort lesn,
is er zwoa Schläg schnella gwesn…
Denn, wia oiwei hat de Presse
s allergrößte Interesse
und de schreibt glei ohne Schona:
Ned amoi s Ozapfn konn a !
So a gstandenes Semester,
körndl gfuaddat, a weng fester,
bringt de Sach vui schneller zamma,
ois a dürrer Boandlkrama !
Und scho deswegn acht er peinlich,
dass er möglichst schnell und reinlich
seinen Test besteht ois Bayer:
Auf geht’s, ozapft is für heier !
Die Rechte und die Verantwortlichkeit für diesen Beitrag liegen beim Autor (Paul Rudolf Uhl).
Der Beitrag wurde von Paul Rudolf Uhl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 24.09.2014.
- Infos zum Urheberrecht / Haftungsausschluss (Disclaimer).