Vorsätze...

Sechs Wochn is as Joahr scho ojd !
Ja, mei – wia schnej de Zeit doch rast…
Und an Sylvesta, do hast hojt
de guadn Vorsätz wieda gfasst:
 
An Obnehma hast do gwieß denkt,
du wojtst di gsünda aa ernährn…
Ned so vuj Rauchn? – Ah – is gschenkt!
Und mehr Bewegung – meine Herrn…
 
De Fastnzeit kimmt auf uns zua -
glei noch m Fasching fangst dann o.
Weil bis in Somma is Zeit gnua:
Im Freibad schau’n  de Leit sonst so…
 
Ned, dass passiert wia letztes Joahr:
Da hast ja goar koan Vorsatz gfasst.
A Wampal hast seitdem – sogoar,
weil Du Di manchmoj geh hojt lasst.
 
Beim FKK – a saubas Weib -
hat gsogt zu Dir an schlimma Text
und deit do auf Dein Untaleib:
I sehg do wos, wos Du ned sehgst!“
 
                                             P.U. 04.02.14