Paul Rudolf Uhl
Weda-Regln
De Dog is „Matheis“* und des hoaßt,
dass er as Eis bricht, wann oans is
und er oans macht, wann er koans findt…
Hat ojwei gstimmt, des woaß i gwieß!
So kunnt de Käjtn aus jatzt sei…
Da Lenzmond, der is nimma weit,
wo s oft scho ziemli woarm gwen is.
Mia tretn ei in d Frühlingszeit!
Werst sehgn, de Starl, de kemman bojd !
Am drittn März is „Kunigund“,
da kamat – wenns no ojwei gejt**,
am Fejd draußt scho de Wärm vo unt…
Wann i ned wüßt, dass z Ostern schneibt
(drum san de Oar ja farbig, weil
ma s sunst im houha Schnee ned findt),
na waar für mi de Welt no heil…
Doch wia s aa kimmt, mia nehman s so,
wia s werd, weil uns nix üba bleibt,
und s Weda ojwei duad, wos mog
und Schindluada mit uns oft treibt…
* 24. Febr. ** gilt P.U. 23.02. 15
Die Rechte und die Verantwortlichkeit für diesen Beitrag liegen beim Autor (Paul Rudolf Uhl).
Der Beitrag wurde von Paul Rudolf Uhl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 23.02.2015.
- Infos zum Urheberrecht / Haftungsausschluss (Disclaimer).