Zweiter Frühling

Des sojt s ja eingli öfta gebm,
dass Leit an zwoatn und aa no
an drittn Frühling goar dalebm
und dass s a vierta aa sei ko…
 
I hob scho üba siebzg dalebt:
Is ojwei Somma, Hirgst no aa
und Winta wordn. – Vor Käjtn* bebt
hob i jedsmoj – des muaß wohj sa…
 
De oidn Boana werdn – ned nett –
des Joahr zun vierasiebtz’gstn Moj
im Winta frieren, des is a Gfrett –
und d Nosn rinnt. – Wos des wohj soj?
 
Zwar is da Hirgst oft schee und bunt,
doch i mechat so gern – (oh, mei –
wann i mia aa wos wünschn kunnt):
Es sojt as ganz Joahr Somma sei !