Palmsonntag

Da Sonndog vor da Karwoch is
Bojmsonndog. Ja – und ma gedenkt
am Jesus, der z Jerusalem
is eigrittn. – Ma hat eahm gschenkt
 
an Jublzug und d Leit, de ham
Bojmzweigal gschwenkt und gschrian hams no
(do ham se gschaugt, d Politika !)
Drum denkt ma heitzudog do dro…
 
A Ross hat Jesus ned ghabt – mei -
drum reit er auf am Esl…  Und
mei Wei’ hat Bojmesl** mi gnennt,
am Sonndog – denn des hat an Grund:
 
Wer zletzt aufsteht, ja no - der is
da Bojmesl, so is da Brauch.
Sie weckt mi um hojb neine erst
und i lieg wirkli no am Bauch…
 
Dann hat s mi glei in d Kircha gschickt,
dass unsa Bojmbusch gweicht* wern ko.
Ob des an Sinn hat, woaß i ned
- bei uns is des hojt obligo…
 
* geweiht     ** Palmesel                    P.U. 29.03.15
 
Ein Palmbuschen ist tradionellerweise ein Gebinde aus
7 Materialien: Palmkätzchen, Buchsbaum, Wacholder,
Stechpalme, Eibe, Zeder und Sadebaum. Jeder  Pflanze
wird eine bestimmte Wirkung zugeschrieben – so soll der
Wacholder vor der Pest und die Eibe vor Hexen schützen…