Busfohrt in´t *Ole Land*

So eene Utfohrt mit´n Bus 
wo du nich sülben fohr´n muss
secht  de Jan to siene Fro
mi dücht dat is een Risiko
denn een Deel dat is wiss
wenn de Bus nich tiedig is
kummt villich poor Stünnen loter
denn fallt de ganze Tour in´t Woter
 
west du, secht Gerda, wat du büst
du büst ´n grooten Pessemist
du molst jümmer allens swatt
ik froch mi blots, wat sall sowat
 
also good, nehmt wie mol an
de Bus de kümmt bi Tieden ran
denn mut dat ober ruck zuck gohn
vun wegen noch lang angestohn
nee, ik mut de Arms hoch krempeln
dörf sogor de Lüd anrempeln
wie een Bekloppten mut ik flitzen
die Gattin möcht am Fenster sitzen
direktemang achtern Chaffeur
süss dicke Luft, grotet Maleur
 
bitte … du wullt an Gang doch jümmer sitten
musst dan Fohrer ünnerstütten
de kümmt jo ahn di gor nich trech
nich mit dat Fohrn un nich mit´n Wech
 
wat is denn dat för´n Argument
trüchstohn mut ik, ober dat bün´k went
un wokeen sitt  wedder achter mi
ik dink blots an de Kotzerie
wenn de Arfensupp in Nacken hest
stinkt dat ok noch wie de Pest
de Fööt de bummelt hin und her
Footstütten gift dat jo nich mehr
över di de Frischluftdüsen
un anner Dachs hest dicke Klüsen
denn heet dat „Stopp“  to´n Rudelmiegen
man dor kannst dat gruseln kriegen
kann ok noch sien, dat in´t Ole Land
dat licht ja meist all op de Hand
dat dor vun Boom een Appel fallt
un batzwech mi op´n Breegen knallt
 
Elementarschaden nömmt man dat
Sprunk in de Schöttel , west du wat
du hest ok jümmer wat to garn
dor kann een richtig fuchtig warn
mel uns doch af,  denn hest du Ruh
mel uns aff, op wat luerst du
 
 
wat büst du för een fünsches Wief
nich een lütt beeten positiv
also ik, ik mook mi keen Gedanken nich
ob de ole Elvbrüch uns ok drich
so eene Busfohrt de het doch Oart
man kann fein slopen wield de Fohrt
bet to´n Dilirium een snasseln
ik glööv du wullt mi dat vermasseln
ober dor hett´n Uhl in seeten
ik stieg in Bus, dat sass du weeten
ik stieg dor in, wiel ik dat will
un du, bliev hier odder swiech still