Bernhard Guttenberger
Feiertog bei 30 Grod
Heit is wieda a Feiertog,
und da Wetterbericht sogt 30 Grod.
Koa Mensch mog dahoam do bleib’n,
olle duat’s an See naus treibn.
Für mi is des a Graus,
drum fahr i in oller Friah schon naus.
As Wasser is no frisch und klar,
de Ruah, de is no wunderbar.
Doch s’is net vo langer Dauer,
und schee langsam werd i sauer.
Von olle Seit’n laffan’s ei,
de Menschnmassn ziemli schnei.
Aufpackelt san‘s mit Luftmatratzn,
mit Sonnaschirm und Windl-Fratz‘n.
Deckan und Handtiacha immer mehrer werd’n,
Schlauchboote miassn aufpumpt werd’n.
Schattenplätz‘ werd’n recht schnei rar,
der Weg zum Wasser – langsam schwaar.
So mancher sogor a Strandmuschl braucht,
von olle Seit’n werst mit Zigarett’n eigraucht.
Dann schleppn’s a no Liegestui o,
gor manchen Sonnabrand siegt ma scho.
Fleißig ei’gschmiert werd mit Öl und Creme,
weiß wia a Wandfarb – angenehm !
Und san‘s dann fertig mit da Kleisterei,
dann trogn’s den Baatz in See dann nei.
Des Wasser schillert zum Verdruß,
und olles stinkt noch Kokosnuß.
Und es gibt no weitere Marott’n,
z.B. wia trocknet werd’n nosse Badeklamott’n.
Do hengan rum – an de Astl vo de Baam,
de Badanzüg und –Hos’n, du glaubst as kaam.
Kinder plärr’n rum, wia net recht g’scheid,
immer mehrer werd’n de Leit.
Mittlerweile hot’s a jeda g’spannt,
s’is Sommer word’n in unserm Land.
Und im hoha Bog’n,
kimmt a Fuaßboi hera g’flog’n.
Dann trifft me no a Frisbee-Scheib’n.
Wo kimmt de her, wo soll de bleib’n ?
A Hund lafft ins Wasser nei – und raus,
und beitlt se vor meiner Decka aus.
Aus am Radio de Musi rappt,
z’letzt wird a no a Grill o’gschleppt.
Mit da gmiatlich’n Ruah is endgültig aus,
i pack jetzt z’samm - fahr in Biergart’n naus.
Denn es gibt wos, wos i gor net gern mog,
am See lieg’n bei 30 Grod, an am Feiertog.
Die Rechte und die Verantwortlichkeit für diesen Beitrag liegen beim Autor (Bernhard Guttenberger).
Der Beitrag wurde von Bernhard Guttenberger auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 08.06.2015.
- Infos zum Urheberrecht / Haftungsausschluss (Disclaimer).