Paul Rudolf Uhl
Sommerhitze
Da Himme blau, de Sonn brennt her,
as Troad* steht schee und guad…
Es reift. - Da Baua gfreit si scho
und hofft, dass s Weda mitspujn duad.
Da Wedadienst, der sogt voraus,
dass ziemli hoaß wern ko!
Vierzg Grod? – Do heart da Spaß fei auf,
a so a Hitz, de schodt fei scho !
Und außadem - bei so na Hitz
Konn s Gwitta gebm – und wia !
Ob do sei Korn no steh bleibm ko?
De weichn Sortn gehen in d Knia…
Und dann. Auf d Spat** zua, ja do kimmt
a Donnaweda auf !
Se zindn d Wedakerzn o,
und betn fest zun Himme nauf…
De Wojkn do san schwoarz und gejb –
und dann haglt s wia bled !
Des Weda haut des Kornfejd zamm…
Ja, gibt s koan Himmevadda ned ?
* Getreide **gegen Abend P.U. 01.07.15
Die Rechte und die Verantwortlichkeit für diesen Beitrag liegen beim Autor (Paul Rudolf Uhl).
Der Beitrag wurde von Paul Rudolf Uhl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 04.07.2015.
- Infos zum Urheberrecht / Haftungsausschluss (Disclaimer).