Der Radldepp

Seltn ma a Sportart findt,
wo da Mensch ganz b’sonders spinnt.
 
Um glei oans vorweg zu nehma,
am schlimmst’n san glei de, de Spinner,
de wos mit’m Radl an Berg obirenna,
dümmer geht’s glei wirkli nimmer.
 
Oba, du triffs’t as a herunt’n auf da Strass’n,
auf’m Woidweg, oder a auf enge Gass’n,
ja so an Radler, den siegt ma guat,
weil er ausschaug’n wia a Kaschpal duat.
 
So wos wia an Helm, hot er auf seim Belli ob’n,
ma kunnt glei moana, er is vom Raumschiff Orion.
In rot und in weiß, oder mit Metallic-Flitter,
schaugn’s aus glei wia de Star-Wars-Ritter.
 
Und wos ma unbedingt braucht, um Gottes Wuin,
des is a stylistische Sonnabruin.
Mit Wechselglasl dunkel und hell,
weil’s Wetta wechselt ja so schnell.
 
Der wos moant, dass er’s Radl’n ganz b’sonders ko,
der hot a Trägerhos’n aus Elastic o‘.
Und für’s Oarschal, des is fei gor net dumm,
gibt’s eignaht – a Sitzpolsterung.
 
De High-Tech Funktionsfaser geht bis zu de Knia,
gar mancher schwitzelt, und des net wia !
Hauteng im Kompressionsmaterial,
der oa oder andre hat bestimmt sei Qual,
 
dass er seine Sachan hi’richt’n duat,
und dass eahm net ob’schnürt glei as Bluat.
Für soiche Sachan‘ s’is glei a Muß,
zu hob’n an elastisch’n Bundabschluß.
 
Und über de Hos’n, ja do ziagt ma o‘,
a angeblich atmungsaktives Langarm-Trikot.
Mit Netzmaterial, für d’Luftzirkulation,
alloa blos vom o’schaug’n do schwitzat i schon.
 
Net oa-farbig, oba kunterbunt ja glei,
Reklameaufschrift – a dabei !
Mit Oberflächen Waben-Struktur,
wiar a Papagei schaugt er aus da Bua.
 
An de Brazn hobn’s Handschuah ohne Finger dro,
damit ma schneller schoit’n ko.
Auf de Pedale, do wird’n d’Schuah ei’klickt,
damit ma Ziag’n und Tret’n ko, des is g’schickt.
 
Jetzt fehlt blos no oans, a Trinkflasch’n braucht er no,
damit er oiwei wieda dro zutzeln ko.
Und oiwei g’scheit daherred’n, recht schlau, so adrett,
so schaut er aus – der typische „Radldepp“.