Sekundenliebe

Z Minga* an a rotn Ampl
steh i mit mein Auto grod.
D Fensta hob i obadraht - ja,
weil s dreißg Grod im Schattn hod.
 
Schau nach links; im Nachbar-Auto
sitzt a Frau, schaut zu mia rum,
tiaf in d Augn, vatraut und offn,
eingli privatissimum…
 
Is bei uns a Fujm obglaffa:
Oj zwoa lieg ma nackad do,
bussln und umarma uns
und mia liabm uns sowieso.
 
Und mia wissen, des is gwieß ja
unsa Partna jatzt fürs Lebm.
Mia ghearn zamm und san uns einig,
dass mia uns jatz oisse gebm.
 
D Ampl schojt auf grün jatz wieda !
Hamma oj zwoa übasehgn…
Hinta uns, da hupns olle,
san dem tête á tête** dagegn.
 
Leg an Gang ei und foahr grodaus,
sie muaß links abbiagn – ja mei -
oj zwoa wiss ma: Schod, valoarn is
unsa Glück, es konn ned sei…
 
* in München    ** unter vier Augen, vertraulich
 
                                                             P.U. 16.07.15