D Amsl singt nimma

Seit a poar Dog is in da Friah
so staad vorm Fensta, komisch, gej?
I hear koa Amslmanndl mehr -
es wird d Saison doch z End ned sei?
 
Hob googlt und do stehts aa drin:
Ab Mitte Juli hearn de auf…
S is eingli schod, des woar doch schee…
Ja, mei - des is da Lebnslauf !
 
Es hat hojt oiss sei Zeit und de -
de bleibt ned steh, im Gegnteil -
se roast dahi, des is moj so…
Und aa de Sonn macht rar si, weil
 
vier Wochn is de Sonnwend her
und desweng kennt ma s scho am Dog:
A ganze Stund is kürza der –
Wos i ja eingli goar ned mog !
 
Und des Joahr war da Somma hoaß,
so dass mia ausm Haus kaum woarn.
Werst sehgn, bojd herbstlts, mei, omei,
Lass uns no schnej in Urlaub foahrn !
 
                                           P.U.  24.07.15