Herbstln duad s

 
De Affnhitz, de is vabei,
aa gregnt hats, doch des hujft uns ned:
da Mais vadrickad, s Obst fast aa,
vo Misserntn  is scho de Red…
 
Es werd si rausstejn, ob s so is:
De Preise, de ziahgn gwieß no o,
berechtigt – aba  oft  aa ned -
Vabraucha kennt’s - s woar ojwei so…
 
De Nächt san kojt worn – dreizehn Grod,
da Dog is zwoa Stund kürza scho.
Fünf Wochan bis zun Wechsl bloß,
zur Dog-und-Nochtgleich, sowieso…
 
As Lauwatz werd scho langsam gejb,
ois ersts san ja de Birkan dro.
De Zeit varrinnt wieda vuj z schnej,
da Somma is a ojda Mo…
 
In mein Lebm is ja aa scho Hirgst:
Aa meine „Blattln“ – wann i s sog -
san gejb – naa, weiß und schütta worn.
Mecht trotzdem no vuj scheene Dog !