Paul Rudolf Uhl
Sportlicher Mann
I woaß, de Frau’n, de stehn auf Männa,
de sportlich san, dynamisch und
mit de se sehgn sich lassn kenna…
Des is doch zum valiabm a Grund!
A soicha bin i: Schifahrn, Langlauf
und Boxn, Fuaßboi, Radlsport…
Soittsd moi dalebn, wia i do durchschnauf!
Aa Leichtathletik und so fort…
I hob oiss, wos de Disziplina
erfordern: - Radio, - TV,
a Couch und Chips und Mandarina
und Bier gnua, wann i Fernseh schau…
Naa, naa – i bin koa Stubnhocka !
Am Fuaßboiplotz, im Stadion
(zwoa Dog de Woch bin i do locker),
do schrei i, wos i plärrn grod konn…
De Tour de France, d Olympiade,
as Auto-Rennats… - Liaba Mo,
des sehg i oiss – aa d Sportparade….
Ja, nur koan Neid – wer ko, der ko!
P.U. 01.06.10
Die Rechte und die Verantwortlichkeit für diesen Beitrag liegen beim Autor (Paul Rudolf Uhl).
Der Beitrag wurde von Paul Rudolf Uhl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 24.09.2015.
- Infos zum Urheberrecht / Haftungsausschluss (Disclaimer).