Weltraum: Is do draußdn wer?

Koa Mensch woaß, ob s do draußt wos gibt,
wos lebt und denkt, grod so wia mia…
Vielleicht is des aa bessa so
und wahrscheinlich erfoahrn ma s nia.
 
Und wenn, na san s leicht kuglrund,
quadratisch, kubisch oda goar
sechseckad, mit acht Haxn glei,
Facettnaugn und ohne Hoar?
 
Leicht hams koan Körpa, bloß no Geist
und lebm in sexter Dimension,
san unsichtboar de meiste Zeit
und ihr Planet hoaßt Sonstwydron?
 
Drum steh i jede Nacht a Stund
am Bankal vor meim kloana Haus,
schick mit da Taschnlampn ja
de ganz Zeit Liachtsignale aus.
 
Wann i a Antwort kriag, fliag i
(viertausnd Liachtjoahr san a Klacks)
mit meina Geisteskraft do hi -
des geht ganz schnej und aa schnurstracks.