Schadenfroh

Neilich, - i steh grod am Fuaßweg-Rand,
kimmt oana daher, mit’m I-Phone in da Hand.
Sei Blick is g’senkt, er wirkt konzentriert,
und wia g’fesselt er in sei Handy eine stiert.
 
Er nimmt sei Umwelt nimmer wahr,
und geht weiter, - i sieg de Gefahr –
dass er wohl im nächst’n Moment,
an den Laterna-Pfost’n voll hi rennt.
 
Immer näher kummt sei Zui, s‘ feit nimmer vui, -
Soll i jetzt wos sag’n ? Naa i schau’s o des G’spui.
Scho macht’s „Peng“ und der Handy-Mo,
pappt mit olle Viere an da Laterna dro.
 
Es hot eahm scheint’s nix schlimmers g’macht,
i hob me umdraht und ganz dreckat g’lacht.