Der Storch

A Storchnnest, des gibt’s bei uns
am Dorf jatzt scho de ganze Zeit,
so lang i denga ko - muaß  sogn. –
de scheenstn Störch sans, weit und breit!
 
An Storchnvatta sehg i oft
a Zeit lang auf oan Haxn steh -
da frog i mi, wos der wohj duad,
weil: Irgnwos muaß do doch geh?
 
As Storchnweibal duad des aa…
Hob s hundat Moj fotografiert…
Na hob i s an de Bujdln kennt
und hob s aa endli dann kapiert:
 
Ob s regnt oda ob d Sonna scheint,
da andre Storch „auf Fuadda“ fliagt:
Ganz deitli seht ma do, dass er
den andan Haxn auffi  ziahgt…