Mia haun ob

Grod viere is, und s’dämmert scho,                            
de graislich‘ Zeit, de geht jetzt o.                                
Poar Blattl’n san no drob’n  am Baam,           
I denk an Somma z’ruck und tram.                             
 
Vo Zeit’n, `s Wetta war no schee,                              
beim Bod’n warn ma draußt am See.                          
Da Näbe liegt jetzt drob’n am Weiher,            
ganz zuadeckt von am graua Schleier.             
 
Da Wind pfeifft eiskoit rum ums Haus,            
koa Mensch, koa Viech geht gern no naus.                 
Zwoa Rabn krachzn,- fliang davo,                  
jetzt fangt’s a no as Renga o.                                      
 
De Feicht’n schleicht se nei en Knocha,                      
a Schnä-Luft hob i grod scho g’rocha.            
Ganz grausig, noßkoit, mi duat’s friarn,           
a trostlos’ Stimmung dua i g’spiarn.                                        
 
Do kimmt mei Frau rei und sie lacht,   
sie sogt, a Buchung hot’s grod g’macht.                      
Beim Reise-Shop hot’s g’macht an Stop,                    
auf de Kanaren hau’ma ob.