Feindbild - ade !

                                   …als ich 10 Jahre alt war:
 
D Franzosn san ja Erbfeind’ - so
hat zu mia irgndwer moj gsogt
Und - wos a Erbfeind eingli is,
des hob i dann mein Opa gfrogt.
 
„Mei – Erb… hat Großvadda sinniat:
S is so – wann drentn übam Rhein
a neicha Mensch geborn jatzt wiad,
der muaß dann unsa Feind scho sei!“…
 
Hob gmoant: “So a unschujdigs Kind?
Naa, naa, des konn doch goar ned sei,
I moan, wer sowos sogt, der spinnt
und füahrt uns in an Kriag doch nei!“…
 
Im zwoatn Kriag, do samma mia
nach Frankreich oafach eimarschiat.
Trotzdem hat si so manche Dirn
in an deitschn  Sojda’n* valiabt…
 
Und Adenauer und De Gaulle –
na guad, de ham grod busslt ned,
aba vasöhnt in Freindschaft wohj.
I find, des war doch aa ned bled…
 
Und d Mama Merkel, de konns ja
mit dene Präsidentn guad…
I moan, dass so a Freindschaft scho
oj zwoa Lända recht guad jatzt duad !
 
* Soldaten                                                                 P.U.  05.06.16