Sonnwend'

Bojd kimmt da längste Dog im Joahr…
Hurra – da Summa fangt iatz o !
A jeda freit si – is ganz kloar:
as Weda warm – vej Sonn und so…
 
Doch andraseits – des muaß so sei –
ab iatzt wern Dog scho kürza und
`s geht wieda Richtung Winta nei…
Des waar zum Frein zwar goar koa Grund !
 
Koa Angst – a  Zeitl dauert s no,
de hoaßn Monat’ kemman erst,
so dass ma  Grilln und Feian ko
und `s gibt bestimmt an scheena Herbst…
 
Dann kemma kurze  Dog und aa
a Zeit, de i so gern ned hob…
Wos sojs – des muaß oafach so sa:
Bist übern Gipfe, geht s bergob…