Der Stelzhamer Franz

Den Franz, den hobi jatzt moi troffa
in Riad* ! - Do woar er oft ja - woaßt?
Der steht ojs Denkmal aufn Sockl
am Plotz, der grod wia er so hoaßt…
 
Ja, er woar scho a groußa Dichta -
schod, dass er lang scho nimma is !
Is gstorbm vor guad hundatfuchzg Joahr und
de sein Versal kennt jeda, gwieß…
 
Dann bin i in a Wirtshaus ganga…
- Do hob i gmoant,  mi trifft da Schlog:
Da Franz hockt do, a wengal  hojzan -
frogt, ob i zurahockn mog…?
 
„Ja, freili, des muaß mia a Ehr sei !“
Na hamma no a wengal gredt,
bis dass mei Bier i drunga  ghabt hob….
- I woaß, des glaabt mia mancha ned !
 
* Ried im Innkreis                                  P.U. 17.07.16