Der Trump

Mit eahm werds langweili goar nia:
Je’n Dog hört ma wos neichs vo eahm,
wos er grod wieda ogstejt* hod -
zmeist is varruckt und ned recht zeam*+
 
Bin froh, dass i a Thema hob…
Do gengan d Versal mia ned aus!
Bin gspannt, wos morgn dann wieda is
(bis iatzt kriagt er  ja no Applaus)…
 
Grod trifft er si mit olle Leit,
de wos zun Sagn ham in ram Land…
De Merkl hod er eiglodn aa…
Wos do wohj rauskimmt? – Bin scho gspannt!
 
Zur Zeit regiert er per Dekret –
Muslime derfn koane nei,
ins Land. – Und da Applaus lasst noch…
I moan, eahm fojt vuj Blödsinn ei…
 
Do redt und macht er recht vuj Schmarrn,
wos er dann doch ned hojtn ko -
so, dass er zruckruadan  dann muaß.
Is des a Clown – a Hamplmo?
 
Moj schaugn, ob s Vojk in hundat Dog
des ojsse akzeptiern no mog…
 
*angestellt          **svw. sauber, bärig, pfundig       
 
                                                                      P.U.  29.01.17