Christa Astl
Zufriedn
I bi nimma jung, i bin nimma schee,
und decht bin i zfriedn, kunnt weita so geh.
I hab vü glernt, war vü zum dalebm,
a bissl wos kann i jetz weitagebm.
Hab Anfang und End gsehng, Lebm und Tod,
hab Menschn begleitet durch Freid und durch Not.
Hab garbat, bin dogwen beim Tag und da Nacht,
de Zeit is vorbei, de Pflicht is vollbracht.
Jetz mecht i füa mi grod a paar Jahrln no lebm
dankbar empfanga, und net grod ois gebm.
Geniaß jetz gern d’ Sonn aufn Banke vorm Haus,
konn d’Welt nimma ändan, lass d’ Sorgn gern drauß.
No is d’ Welt schee, bin dankbar dafia,
und i bin zfriedn, leb im Einklang mit iah.
ChA 10.03.12
Die Rechte und die Verantwortlichkeit für diesen Beitrag liegen beim Autor (Christa Astl).
Der Beitrag wurde von Christa Astl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 11.06.2017.
- Infos zum Urheberrecht / Haftungsausschluss (Disclaimer).