es Herbstelt...

Am Baam, bei uns do gegnüba,       

do sand scho gejbe Blattln drauf…

I schaug a diamoj* zu eham nüba

und sog mia: „Reg di bloß ned auf!

Des is bloß, weil da Summa heia

so hoaß und trockn amoj woar.

Na guad, danoch hat s zwöjf Dog gregnt, doch

des heift nix mehr, des is scho kloar,

weil grouße Äst san eahm vatrickad,

des hojt da Regn ja nimma auf.“

Do woar da Petrus heia z knickad,

des is an Baam sei Lebnslauf…

Da Borknkäfa bei de Fichtn,

der hat si gfreit, hat zuagschlogn schlimm:

Do sand vuj Baam nimma zun rettn,

i sehg s, wann durch n Wojd i kimm:

De Rindn fojt zun Großteil oba

und Hojzmehj** liegt am Bodn drunt…

Da Hojzpreis sinkt, de Forstwirt schimpfan,

se ham dazua aa jedn Grund…

*gelegentlich    ** Holzmehl                      P.U.  02.08.17