A Regn-Dog

An Regn-Dog ham s ogsogt heit

im Radio, im Fernsehn aa…

Schaug naus bein Fensta de ganz Zeit:

Mei, greislich is – ja, muaß des sa?

I ziahg as Nachtgwand goar ned aus,

laff bloß no min Pyjama rum,

geh n ganzn Dog ned aus n Haus

und wer mi o redt, heart grod: „Brumm!“

Geh noch n Frühstück num ins Bett,

auf d Couch dann noch n Essn glei,

zun Kaffee wieda auf – a Gfrett -

(den gibt’s bei uns so um ra drei)!

Aa in da Zeitung steht nix gscheids –

bring s Kreizworträtsl ned moj raus!

Zur Obmdsuppn drink i b’reits

zwoa Bier – a Leber lafft ma üba d Laus…  (;-))

Dann hock ma uns vor s Fernsehn hi:

Zwoa Krimis, Nachrichtn no glei…

Wann s weida geht so – Sakradie –

werd s Bäuchal wieda dicka sei…