SEHNSUCHT

Der Stern do drobm, der gfojt mia so –

i woaß ned, wia der eingli hoaßt…

Do mecht i hi – vielleicht fliag i

bojd nauf (des mecht i so gern, woaßt?):

Raketn – Flugzeig? - Brauch i ned -

wuj sejba fliagn – i moan, des geht,

wann i ganz fest dro glaab. - Ganz gwieß,

zun Stern, der neba n Mond do steht…

Vuj stärka ojs Raketn-Trieb –

so moan i – sand Gedankn scho,

weil koa Materie werd bewegt

und dass i fliagn damit bojd ko!

Hob draamt, dass drobm so bärig* is,

weil s do koan Kriag gibt, koan Kommerz

und Friedn is do aa ganz gwieß.

Wer dort lebt, der denkt mit n Herz!

Mei Wei und i, mia baun do drobm

a Menschheit volla Treu, ja und

wojn uns de ewig Liab gelobm…

Dei Hand! – Zun Dobleibm gibt s koan Grund!

*pfundig, herrlich…                                               P.U.  26.08.17