SAUWEDA !

Novemba is und ojss is  grau

und saukojt werd s scho in da Nacht.

Mog aus n Fensta goar ned schau…

I stej mia vor, de Sunna lacht

und mia sitzn am Strand, do drunt,

so in da Südsee – irgndwo:

De Hula-Madln sand so bunt

und danzn, singa – sowieso…

Doch naa – a Wunschtraum is des bloß,

so a Gedanknfetzn grod -

des Sauweda is rigoros…

Nix Südsee! – Und i find des schod!

I geh ins Bett, mach d Augn zua,

do geht der Draam scho wieda o:

De Hula-Madln, kurze Röck

und aa so scheene Busn no…

Auf oamoj wieda so a Krach!

Wos is? – A so, da Wecka plärrt…

Mecht so gern weida draama. - Ach:

i sehg, dass wieda Regndog werd!

I hätt des  liaba umkehrt ghabt,

nämli des Südsee*: Wirklichkeit,

da Draam vo miar aus ohne Sonn…

Mei Wei moant: „Paule, sei doch gscheid –

Woaßt eh, dass ma s ned umdrahn konn!

*Polynesien, Südpazifik, allgemein mit Hawaii verwechselt                   

                                                                           P.U.  03.11.17