Grippevirus

Ja, wo ma hi schaugt, konn ma s sehgn:

Vuj Leit san Grippekrank iatzt gwen!

De Vogl - und de Schweinegripp -

und koana schreit hurra-hipp, hipp!

Weil: wann s d dei Hand wem gibst, o,mei,

na konnst vielleicht da nächste sei…

Es hoaßt, Bewegung, Vitamin,

na hupft der Virus sonst wo hin…

Und Händ waschn sojst jedn Dog

zwanzg Moj – des is fei scho a Plog!

Zerst hob i gmoant, i waar immun,

für mi is d Gripp ned opportun!*

Doch Solidarität is gfrogt -

so hob i mia na doch moj gsogt:

I bin ins Wirtshaus eini kemma

(i muaß doch aa mei Gripp moj nehma!):

N2H5:  fünf Hojbe  Bier,

dazua kauf i zwoa Schachtln mia

vo dem Genussgift Nikotin,

weil i doch solidarisch bin…

Hob s gschafft, iatzt lieg i aa ganz flach

und huast und schnupf mit Weh und Ach…

Dann woar des gottseidank vabei,

zwöjf Dog voj Nias-und Huastarei…

*angebracht                                                      P.U.  15.03.18

              Anmerkung: bin seit 38 Jahren Nichtraucher!   (;-))