Zeitverlust

Ja, Zeit is Gejd – so geht a Spruch

und grod an Zeit geht vuj valorn:

Nein Monat muaß ma woartn ja,

bis endli dann ma werd geborn…

Muaßt joahrelang in d Schuj geh drauf,

so lang dauat s zum Abitur…

fünf Joahr studiern – des regt mi auf:

Bis zum Beruf - Valuste pur!

As Woartn kost oft recht vuj Zeit -

bein Stau, do auf da Autobahn,

im Woartezimma aa bein Doc

und aufn Amt – ja, Mannomann!

Und ungern grod und voj bewusst

valier i Zeit an jedn Dog,

hob übaroj i Zeitvalust,

obwohj Valuste i ned mog…

Am Fundamt hob i aa scho gfrogt,

ob wer mei Zeit iazt gfundn hod.

„Zeit hamma koane!“ ham se gsogt…

Vaflixt – i find des wirkli schod.

Und brave Finda gibt s koa mehr !

An jedn geht’s nämli wia mia,

Zeit bringt bestimmt do koana her –

An Zeitmangl – do stirbt ma schier !                   

P.U. 13.07.18